إلى الله: شكرًا لأنك صديقي

http://www.nooun.net/show_article/%D8%A5%D9%84%D9%89-%D8%A7%D9%84%D9%84%D9%87:-%D8%B4%D9%83%D8%B1%D9%8B%D8%A7-%D9%84%D8%A3%D9%86%D9%83-%D8%B5%D8%AF%D9%8A%D9%82%D9%8A/

 

بقلم/ إنجي الطوخي

إلى ربنا، عامل إيه؟ فيه ناس يا رب هتندهش إن أنا بكلمك كده، بس الحقيقة إن حضرتك يا رب محددتش لينا شكل معين للكلام معاك "زي قصة موسى والراعي". والحقيقة أكتر إن فيه ناس متعرفش إننا لازم نكلمك كل فترة نحكيلك ونشكيلك.. ونسمعك بقلوبنا بتقولنا نعمل أيه.

فكرت كتير هكتبلك إيه.. وبصراحة إني أجد شيء محدد كان صعب.. الحياة كبيرة أوي يا رب.. أبعتلك رسالة عن إيه ولا إيه؟ 

خلينا نبدأ بـ...

رسالة شكر: 

ده حقيقي عايزة أشكرك أوي يا رب.. عايزة أشكرك على حاجات حصلت معايا في الخمس سنين اللي فاتوا.. وقبل كده كمان، على الناس اللي خلتني سبب في مساعدتهم وتغيير حياتهم، على السفر، على الحب، على الأمل، على صاحب الشغل -شخصية كبيرة- اللي اعتذرلي بعد سنتين من ترك الشغل رغم إني عمري ما توقعت إن ده يحصل.. على الهدايا الحلوة اللي بتيجي في شكل دعوة من أشخاص معرفهمش، أو كلمة حلوة أسمعها تخليني أغير فكرتي عن الحياة. 

كلاكيت تاني مرة "رسالة شكر":

على الناس اللي بعتّهملي وقفوا جنبي في كل لحظة فيها كنت فيها ضعيفة أو مكسورة، على الناس اللي كانت طبطتهم عليّ طبطبة خفية منك على ضهري، وهمسة بإني لازم أقوم وأستمر في الحياة، على الناس اللي مكنش فيه سابق معرفة بيني وبينهم وكان دخولهم سبب في معرفتي بيك أكتر، وعلى الناس اللي حببوني أكتر في الحياة واتعلمت منهم معناها الحقيقي. 

رسالة اعتذار :

لازم أعتذر منك الحقيقة يا رب.. تقريبًا الناس كلها لازم تعتذر منك في الحتة دي إننا بننشغل عنك وبعدين أرفع راسي للسما وأسألك: إنت نسيتني؟ أو أسألك: إنت بعيد عني ليه؟ الفكرة كلها إني بنسى وتقريبًا اللي بيسأل السؤال ده بيبقى ناسي إننا اللي بعدنا عنك مش إنت اللي بعدت، إنت معانا دايمًا يا رب في كل لحظة من حياتنا بس إحنا اللي بننساك يا رب في زحمة الشغل والحياة والصحاب والأهل. 

رسالة "أنا آسفة":

أنا آسفة إني اعترضت على حاجة حصلتلي في حياتي وكانت سبب في تغييرها للأحسن، بنعترض كتير على حاجات بنتعرضلها وبنصمم إن اختياراتنا هي الأحسن من غير ما نبص لحكمتك أبدًا، من غير ما نقدّر إن بعد مرور فترة من الزمن هنقف ونبص على حياتنا ونضحك من نفسنا على اعتراضنا على اختيار كان سبب في تغييرها للأحسن.

رسالة "مكانش قصدي":

إني مقدرتش قيمة أشخاص أو أشياء إلا بعد ما فقدتهم، مكانش قصدي إني محافظش عليهم.. مكانش قصدي إني أسأل حد، مكانش قصدي مضحكش في وش حد وأنا متضايقة، أو من جوايا بعيط، مكانش قصدي مقفش جنب أي إنسان أنا المفروض أقف معاه أو معاها. 

رسالة "طلب سماح":

أيوه إنك تسامحني على الناس اللي غلطت في حقهم وأنا مقصدش أو معرفش، وقصرت معاهم في حقوقهم، كلهم يا رب وأولهم عيلتي. 

عارف يا رب؟ عايزاك تسامحني حتى على الناس اللي كنت بتضطرني إني أعمل معاها كده.. أما أكتر حاجة نفسي تسامحني عليها.. هي إني في يوم من الأيام كنت عايشة حياة مش حياتي وواخدة دور في الحياة مش دوري.. وبعيش حياة غيري من غير ما أفكر إنت خلقتني ليه.